Airbus-ийн онгоц 23,000 гаруй км зогсолтгүй нисэж, дэлхийн шинэ рекорд тогтоолоо

A350-1000ULR онгоц 23,000 гаруй км зогсолтгүй нисэж, дэлхийн шинэ рекорд тогтоолоо

Австралийн "Qantas" агаарын тээврийн компанид зориулан хөгжүүлж буй "Airbus A350-1000ULR" туршилтын онгоц Мельбурн хотоос Францын Тулуз хүртэл 24 цаг 24 минутын турш нийт 23,075 км замыг зогсолтгүй тууллаа. Ингэснээр иргэний агаарын тээврийн онгоц нэг нислэгээр хамгийн хол зайд ниссэн дэлхийн дээд амжилтыг шинэчлэн тогтоож байна. Өмнөх рекордыг 2005 онд "Boeing 777-200LR" онгоц 21,601 км зайд нисэж тогтоож байв.

Энэхүү нислэг нь жирийн нэг зорчигч тээвэр биш, "Airbus"-ийн мэргэжилтнүүдийн гүйцэтгэсэн технологийн туршилтын нислэг байлаа. Онгоц Номхон далайг гатлан АНУ, Канадын агаарын замаар дамжин Атлантын далайг ширээж Францад газардсан юм. Агаарт өнгөрүүлсэн хоног гаруйн хугацаанд онгоцны нэмэлт түлшний сав, түлш шахуургын систем, бүхээгийн агааржуулалт болон 20-иос дээш цагийн нислэгт зорчигчдод үзүүлэх тухтай орчныг туршин шалгажээ.

Сиднейгээс Лондон руу шууд ниснэ "Qantas" компани энэхүү загварын онгочноос 12 ширхэгийг захиалсан бөгөөд эхний хөлгөө 2027 оны 4 дүгээр сард хүлээн авахаар төлөвлөж байна. Манай гарагийн хамгийн урт тогтмол шууд нислэгт тооцогдох Сидней–Лондон чиглэлийн аяллыг 2027 оны 10 дугаар сараас эхлүүлэх бөгөөд цаашид Сиднейгээс Нью-Йорк руу мөн зогсолтгүй нисэхээр төлөвлөжээ.

Сонирхолтой баримт: Энэхүү түүхэн нислэгийг Flightradar24 платформоор 3.65 сая гаруй хүн шууд ажигласан нь тус системийн түүхэнд хамгийн олон хүн нэгэн талбарт дагаж хянасан нислэгийн 2-рт бичигдлээ.

Таны хувьд 20 гаруй цагийн турш агаарт зогсолтгүй нисэж зорьсон газартаа хурдан хүрэхийг сонгох уу, эсвэл замдаа бууж амрангаа аялахыг илүүд үзэх үү?