Кореан Эйр компани "2026 Cellars in the Sky" уралдаанаас 6 шагнал хүртлээ

Кореан Эйр авиа компани нислэгийн үеэр үйлчилдэг дээд зэрэглэлийн дарсны цуглуулгаараа дэлхийн тавцанд дахин шалгарч, "2026 Cellars in the Sky Awards" (Нислэгийн дарсны олон улсын уралдаан)-аас нийт 6 номинацид шагнал хүртлээ.

Их Британийн Лондон хотноо саяхан зохион байгуулагдсан, дэлхийд нэр хүндтэй тус тэмцээнээс 1 алт, 4 хүрэл медаль, 1 тусгай шагнал хүртсэнээ Кореан Эйр компаниас мэдээлэв.

Уралдааны Тэргүүн зэрэглэлийн амттан дарсны (First Class Dessert Wine) төрөлд Château Guiraud 2022 дарс 94 оноогоор тэргүүн байр эзэлж, Алтан медаль хүртжээ. Тус дарс нь гүн алтан шаргал өнгө, өтгөн бүтэц болон десерттэй гайхалтай зохицдог анхилуун үнэрээрээ шүүгчдээс өндөр үнэлгээ авсан байна.

Мөн Тэргүүн зэрэглэлийн улаан дарсны төрөлд Shafer One Point Five 2023, Бизнес зэрэглэлийн оргилуун дарсны төрөлд Champagne Palmer & Co Grands Terroirs 2015 дарсаар тус тус хүрэл медаль (3 дугаар байр) хүртлээ.

Үүнээс гадна тус авиа компани "Тэргүүн зэрэглэлийн шилдэг дарсны цуглуулга" болон "Бизнес зэрэглэлийн шилдэг дарсны цуглуулга" номинацид тус бүр 3 дугаар байр эзэлж, хоёр хүрэл медаль нэмж авсан байна. Түүнчлэн Тэргүүн зэрэглэлд (First Class) үйлчилдэг Krug Grande Cuvée 173ème Édition дарс нь "Тусгай шагнал"-ын эзэн болжээ.

Олон улсын аяллын "Business Traveller" сэтгүүлээс зохион байгуулдаг "Cellars in the Sky" уралдаан нь 1985 оноос хойш дэлхийн авиа компаниудын Тэргүүн болон Бизнес зэрэглэлийн дарсыг шалгаруулж ирсэн нэр хүндтэй тэмцээн юм. Шүүлтүүрийг хараат бус шинжээчдийн баг дарсны шошгыг харахгүйгээр (blind tasting) үнэлэх зарчмаар явуулдаг байна.

Кореан Эйр компани одоогоор нийт 61 төрлийн дарс санал болгодог бөгөөд үүний 20 нь Тэргүүн зэрэглэлд, 30 нь Престиж (Бизнес) зэрэглэлд зориулагджээ. Зорчигчдод баялаг сонголт олгох үүднээс нислэгийн нөхцөл байдал болон хоолны цэстэй хамгийн сайн зохицох дарснуудыг шилж сонгон, цуглуулгаа тогтмол шинэчилдэг байна.

🍷 Шагналт дарснуудын дэлгэрэнгүй танилцуулга:

1. Château Guiraud 2022 (First Class Dessert Wine – Алтан медаль) Бордо мужийн алдарт Саутернес (Sauternes) бүсэд орших, дээд зэрэглэлийн амттан дарс гаргаж авахад нэн тохиромжтой чийглэг, 80% элсэн хайрга, 20% шимт хөрс болон шохоолог чулуу бүхий усан үзмийн талбайн ургацаар урлажээ. Гүн алтан шаргал туяатай энэхүү дарс нь чангаанз, тоор, халуун орны жимсний баялаг анхилуун үнэрийг мармелад болон ванилийн зохицолтой хослуулсан тансаг амттай.

2. Shafer One Point Five 2023 (First Class Улаан дарс – Хүрэл медаль) Дарсны нэрт шүүмжлэгч Роберт Паркероос 6 удаа төгс оноо авч байсан Напа Хөндийн (Napa Valley) шилдэг үйлдвэрийн бүтээгдэхүүн юм. Бөөрөлзгөнө, нил цэцэг (violet), гоньд болон бал чулууны холимог анхилуун үнэртэй бөгөөд хилэн мэт зөөлөн таннин, хүчирхэг хэрнээ эрхэмсэг төгсгөл бүхий амтыг мэдрүүлнэ.

3. Champagne Palmer & Co Grands Terroirs 2015 (Бизнес зэрэглэлийн оргилуун дарс – Хүрэл медаль) Монтань де Реймс (Montagne de Reims) бүсийн зөвхөн Премьер болон Гранд Крю зэрэглэлийн тосгодоос түүсэн усан үзмийг боловсруулан гаргаж авчээ. Оранж цэцэг болон хуайс (Acasia) модны шар жимсний үнэрээр эхэлж, амтлах явцад цитрус, бриош нарийн боов, хатаасан жимсний шинэлэг бөгөөд зөөлөн кремлэг амтыг цогцлоосон дарс юм.

4. Krug Grande Cuvée 173ème Édition (First Class Оргилуун дарс – Тусгай шагнал) Жил бүр хэдэн мянган удаагийн шошгогүй амталгаагаар шилж сонгон, 7-гоос дээш жил дарж боловсруулдаг байна. Бага зэрэг хайрсан бриош боов, хуурсан ойн самар, зөгийн балтай алимны баялаг анхилуун үнэрийг ялгаруулах бөгөөд нарийн жижиг бөмбөлгүүд болон цитрусын сэргэг хүчиллэг амт нь гайхалтай тэнцвэрийг мэдрүүлдэг.