Korean Air болон Asiana Airlines компаниуд нэгдэх гэрээнд гарын үсэг зурлаа

Korean Air болон Asiana Airlines компаниуд нэгдэх гэрээнд гарын үсэг зурлаа

1. Хэлцлийн явц болон түүхэн алхмууд

Талуудын Төлөөлөн удирдах зөвлөл (ТУЗ) 5 дугаар сарын 13-ны өдрийн ээлжит хурлаараа хоёр компани нэгдэх асуудлыг баталж , улмаар 5 дугаар сарын 14-ний өдөр нэгдэх гэрээнд албан ёсоор гарын үсэг зурлаа.

Нэгдсэн агаарын тээврийн компани нь 2026 оны 12 дугаар сарын 17-ны өдрөөс эхлэн "Нэгдсэн Кореан Эйр" нэрийн дор онгоцоо хөөргөж , үйл ажиллагаагаа албан ёсоор эхлүүлэхээр огноог зарлаад байна.

Энэхүү нэгдэх үйл явц нь 2020 оны 11 дүгээр сарын 17-ны өдөр компаниудын хооронд шинэ хувьцаа худалдан авах гэрээ байгуулснаас хойш 5 жил 6 сар гаруйн хугацаанд үргэлжилж байна.

Өмнө нь COVID-19 цар тахлын улмаас зорчигч тээврийн эрэлт огцом буурч, Asiana Airlines компанийн санхүүгийн бүтэц, өрсөлдөх чадвар суларсан тул БНСУ-ын Засгийн газар болон зээлдүүлэгчид агаарын тээврийн салбарыг тогтворжуулах зорилгоор нийт 3.6 их наяд воны бодлогын хөрөнгийн дэмжлэг үзүүлж байжээ.

Korean Air компани нь уг худалдан авах, нэгтгэх үйл явцын хүрээнд Asiana Airlines-ийн менежментийг хэвийн болгох, санхүүгийн бүтцийг сайжруулахад тасралтгүй хүчин чармайлт гаргаж, Засгийн газраас олгосон санхүүгийн дэмжлэгийг бүрэн төлж барагдуулсан байна. Үүний үр дүнд дотоодын агаарын тээврийн салбарын бүтцийн өөрчлөлтийг амжилттай гүйцэтгэсэн Korean Air компани нь нэгдсэн авиа компани болсноороо дэлхийн зах зээлд өрсөлдөх чадвараа бэхжүүлж, тогтвортой өсөлтийн суурийг бүрдүүлэхээр төлөвлөж байна.

2. Нэгдэх нөхцөл, санхүүгийн болон хууль зүйн зохицуулалт

Хөрөнгийн зах зээлийн хууль тогтоомжийн дагуу суурь хувьцааны үнэд үндэслэн нэгдэх харьцааг Korean Air 1 : Asiana Airlines 0.2736432 байхаар тооцсон байна. Суурь хувьцааны үнийг сүүлийн 1 сарын жигнэсэн дундаж хаалтын үнэ, сүүлийн 1 долоо хоногийн жигнэсэн дундаж хаалтын үнэ болон ТУЗ-ийн хурлын өмнөх өдрийн хаалтын үнийн дунджаар тодорхойлжээ.

Гэрээний дагуу Korean Air нь Asiana Airlines-ийн хөрөнгө, өр төлбөр, эрх үүрэг болон нийт ажилчдыг бүрэн хүлээн авах бөгөөд үүний дагуу Korean Air-ийн дүрмийн сан ойролцоогоор 101.7 тэрбум воноор нэмэгдэх төлөвтэй байна.

Korean Air компани нь Хууль зүйн яамнаас зарласан "Компанийн зохион байгуулалтыг өөрчлөх үеийн ТУЗ-ийн үйл ажиллагааны удирдамж"-д зөвлөсөн шударга байдлыг бэхжүүлэх арга хэмжээнүүдийг бүрэн хэрэгжүүлсэн. Үүний тулд өөрийн ESG хороонд тусгай хорооны чиг үүргийг даалгаж, нэгдлийн хэлцлийн нөхцөл, шударга байдлыг нарийвчлан хэлэлцсэн байна. Мөн хараат бус хөндлөнгийн шинжээчдээр нэгдэх үнэ (харьцаа)-ний зохистой байдал, тооцоолох аргачлалыг хянуулж, хувьцаа эзэмшигчдийн ашиг сонирхлыг хамгаалах тогтолцоог үнэлж дүгнэжээ. Улмаар үнэт цаасны мэдүүлэгт эдгээр арга хэмжээний хэрэгжилт, үр дүнгийн талаар дэлгэрэнгүй тусгахаар төлөвлөж байна.

Гэрээ байгуулагдсаны дараа даруй Зам, тээврийн яаманд нэгдэх зөвшөөрөл авах хүсэлтээ гаргасан бөгөөд ирэх 6 дугаар сард багтаан нисэхийн аюулгүй байдлын дагаж мөрдөх нөхцөл, хязгаарлалтуудыг тусгасан “үйл ажиллагааны техникийн нөхцөлийг” (OpsSpecs) өөрчлөх зөвшөөрлийн хүсэлтийг гаргахаар төлөвлөж байна. Эни нь нэгдэл дууссаны дараа үлдэх Korean Air-ийн одоогийн нислэгийн үйл ажиллагааны гэрчилгээг (AOC) хэвээр хадгалахын зэрэгцээ Asiana Airlines-ийн агаарын хөлөг, аюулгүй ажиллагааны системийг бүхэлд нь өөрийн тогтолцоонд нэгтгэх хууль зүйн болон захиргааны үйл явц юм. Дотоод дахь зөвшөөрөл авах үйл ажиллагаа дуусмагц гадаад улсуудын нисэхийн эрх бүхий байгууллагуудад хандан шаардлагатай арга хэмжээг шат дараатай авна.

Asiana Airlines нь ирэх 8 дугаар сард хувьцаа эзэмшигчдийн ээлжит бус хурлыг зарлан хуралдуулж, нэгдэх асуудлыг эцэслэн шийдвэрлэхээр төлөвлөж байна. Korean Air-ийн хувьд жижиг хэмжээний нэгдлийн шаардлагыг хангаж байгаа тул Asiana Airlines-ийн хувьцаа эзэмшигчдийн хурал болох өдөр ТУЗ-ийн шийдвэрээр хувьцаа эзэмшигчдийн хурлыг орлуулан хийх төлөвлөгөөтэй байна.

3. Аюулгүй ажиллагаа, дэд бүтэц болон зорчигч үйлчилгээний шинэчлэл

Зорчигчдын сонголтыг өргөжүүлэх үүднээс давхардсан чиглэлүүдийг дахин хуваарилж, шинэ чиглэлүүдийг хөгжүүлж байна. Мөн нисэх онгоцны буудлын лоунжийг шинэчлэх, онгоцны хоолыг сайжруулах, нисэх буудлын терминалыг шилжүүлэх зэргээр үйлчилгээний чанарыг эрс дээшлүүлсээр ирсэн. Хоёр компанийн майл (mileage) оноог нэгтгэх төлөвлөгөөг Шударга өрсөлдөөнийг зохицуулах хороо зэрэг байгууллагуудтай нягт зөвшилцөж байгаа бөгөөд эцэслэн батлагдмагц зорчигчдод мэдээлэх болно.

Нэгдсэний дараа нэмэгдэх агаарын хөлгийн парк, нислэгийн чиглэл, боловсон хүчнийг бэлтгэх зорилгоор Сөүл хотын Гангсо дүүрэгт байрлах төв байрны Нэгдсэн удирдлагын төв (OCC), ажилчдын сургалтын төв, Нисэхийн эмнэлгийн төвийг шинэчлэн засварлаж, илүү үр ашигтай ажлын системийг бүрдүүлсэн. Нэгдэл дууссаны дараа шууд үүсэж болох нислэгийн үйл ажиллагааны төөрөгдлийг бууруулж, аюулгүй аяллыг хангахын тулд хоёр компанийн нисэх багийн сургалтын хөтөлбөрийг стандартчилсан байна.

Аюулгүй ажиллагааг хангах үүднээс урьдчилсан бэлтгэл ажил, хөрөнгө оруулалтыг үргэлжлүүлэн хийж байна. Үүний хүрээнд хөдөлгүүрийн туршилтын ангар (ETC), шинэ хөдөлгүүрийн засварын үйлдвэр, Инчон олон улсын нисэх буудлын орчим дахь засвар үйлчилгээний ангар зэрэг томоохон хэмжээний агаарын хөлгийн засвар үйлчилгээний байгууламжуудыг өргөтгөх буюу шинээр барьж байна.

4. Хүлээгдэж буй стратегийн үр нөлөө

Korean Air нь нэгдсэн агаарын тээврийн компани болохыг угтуулан дэлхийн хэмжээний томоохон авиа компаниудтай өрсөлдөхүйц суурь нөхцөл болох аюулгүй ажиллагаа болон зорчигч үйлчилгээг сайжруулахад анхаарч байна. Нэгдсэн агаарын тээврийн компанийг байгуулснаар БНСУ-ын нисэхийн салбарыг шинэ шатанд гаргах дараах үндсэн зорилтуудад хүрнэ гэж найдаж байна:

• БНСУ-ын нисэхийн салбарын дэлхийн зах зээл дэх өрсөлдөх чадварыг хамгаалж бэхжүүлэх
• Инчон олон улсын нисэх буудлын хаб (Hub) чиг үүргийг улам нэмэгдүүлэх
• Глобал нислэгийн сүлжээг өргөжүүлэх