АНХААРУУЛГА: БНХАУ-д зорчих иргэд "Хилээр нэвтрэх хуудас"-аа заавал цахимаар бөглөнө

БНХАУ-ын Үндэсний Цагаачлалын Газраас (NIA) хилээр нэвтрэх гадаадын иргэдийн бүртгэлийг хялбарчлах, нэвтрэх хурдыг нэмэгдүүлэх зорилгоор 2025 оны 11 дүгээр сарын 20-ны өдрөөс эхлэн "Хилээр нэвтрэх хуудас"-ыг (Foreigner Arrival Card) улс даяар цахим хэлбэрт шилжүүллээ.

⚠️ Зорчигчдод өгөх санамж:
Хөх хот болон БНХАУ-ын бусад чиглэлд зорчиж буй иргэд нислэгт гарахаас өмнө цахим хуудсаа урьдчилан бөглөх шаардлагатай. Хил дээр очоод бөглөх нь шалган нэвтрүүлэх хэсэгт бөөгнөрөл үүсгэх, нислэгийн үйл ажиллагаа болон бусад зорчигчдод саатал учруулах эрсдэлтэй тул доорх зааврын дагуу урьдчилан бэлтгэнэ үү.

📲 Цахим хуудас бөглөх сувгууд:
Зорчигчид дараах аргуудаар мэдээллээ илгээх боломжтой:

• Хавсралтад байгаа QR кодыг уншуулах.
• Үндэсний Цагаачлалын Газрын (NIA) албан ёсны цахим хуудас болон "NIA 12367" аппликейшн.
• WeChat болон Alipay-ийн мини программууд.

💡 Дараах 7 ангиллын иргэд цахим хуудас бөглөхөөс чөлөөлөгдөнө:

1. БНХАУ-ын гадаадын иргэний байнгын оршин суух үнэмлэх (PR card) эзэмшигчид.
2. Хонконг, Макаогийн иргэдийн эх газарт зорчих үнэмлэх эзэмшигчид.
3. Групп визтэй эсвэл бүлгийн визгүй зорчих нөхцөлтэй иргэд.
4. 24 цагийн шууд транзитаар зорчиж буй, хилийн бүсээс гарахгүй иргэд.
5. Далайн хөлөг онгоцоор ирж, буцах зорчигчид.
6. Хилийн автомат гарцаар (e-channel) нэвтрэх иргэд.
7. Олон улсын тээврийн хэрэгслийн багийн гишүүд (онгоц, галт тэрэг, усан онгоцны ажилтнууд).

Тэмдэглэл: Хэрэв танд цахим систем ашиглах боломж байхгүй тохиолдолд хил дээрх шалган нэвтрүүлэх цэгт уламжлалт цаасан хуудсыг бөглөж болох ч цаг хугацаа хэмнэх үүднээс цахим хэлбэрийг сонгохыг зөвлөж байна.

Хилээр нэвтрэх хуудас бөглөх холбоос: https://s.nia.gov.cn/ArrivalCardFillingPhone/