✈️ British Airways бүх нислэгтээ Starlink-ийн үнэгүй Wi-Fi нэвтрүүлнэ

Их Британийн авиа компани нь сансрын интернетийн үйлчилгээ үзүүлэгч Starlink-тэй түншилснээ зарлалаа. Энэхүү түншлэлийн хүрээнд ойрын болон холын зайн бүх нислэгүүдийг 350 MB/Second хүртэлх хурдны интернетээр хангах юм.

Одоогоор British Airways-ийн зорчигчид зөвхөн нэгдүгээр зэрэглэлээр ниссэн тохиолдолд л Wi-Fi ашиглах боломжтой байдаг. Бусад зорчигчдын хувьд интернет ашиглах төлбөр 22 фунт (≈ 105,000₮) хүрдэг аж. Түүнчлэн, тус компанийн бүх агаарын хөлөгт Wi-Fi роутер суурилуулаагүй бөгөөд одоогийн сүлжээний хурд тогтворгүй байдаг талаар гомдол байнга ирдэг байна.

Шинэ технологийг нэвтрүүлэх ажил ирэх оноос эхэлнэ. Starlink-тэй өмнө нь Европын өөр хоёр тээвэрлэгч болох Air France болон Virgin Atlantic компаниуд хамтран ажиллаж эхэлсэн. Air France өнгөрсөн есдүгээр сараас сансрын Wi-Fi-тай нислэгүүдээ эхлүүлсэн бол Virgin Atlantic 2026 оны гуравдугаар улиралд уг хөтөлбөрийг эхлүүлэхээр идэвхтэй бэлтгэж байна.