Истанбулын нисэх буудлуудын үнэ төлбөргүй Wi-Fi ЦАГИЙН ХЯЗГААРГҮЙ боллоо!

Стамбул хотын хоёр нисэх онгоцны буудал зорчигчдын тав тухыг нэмэгдүүлэх зорилгоор хязгааргүй, үнэгүй Wi-Fi үйлчилгээг нэвтрүүллээ.

Истанбул нисэх онгоцны буудал (IST):

Өмнө нь энэхүү нисэх буудалд зорчигчид зөвхөн нэг цагийн хугацаанд үнэгүй Wi-Fi ашиглах боломжтой байсан бол одооноос хязгаарлалтгүй, үнэ төлбөргүйгээр интернетэд холбогдох боломжтой боллоо.

Зорчигчид Wi-Fi сүлжээнд дараах хоёр аргаар холбогдох боломжтой:

1. Гар утасны дугаараар холбогдох: Гар утаснаасаа "İGA Wi-Fi" сүлжээг сонгож, өөрийн утасны дугаарыг оруулна. SMS-ээр ирэх баталгаажуулах кодыг оруулснаар интернетэд холбогдоно.

2. Паспорт ашиглан холбогдох: Терминалд байрлах тусгай зориулалтын киоск дээр паспортаа сканнердан олгогдох кодыг ашиглан Wi-Fi сүлжээнд холбогдох боломжтой.

Сабиха Гөкчэн нисэх онгоцны буудал (SAW):

Энэ нисэх буудалд мөн өмнө нь үнэгүй Wi-Fi үйлчилгээг зөвхөн нэг цаг ашиглах боломжтой байсан бөгөөд интернетэд холбогдохын тулд паспортаа сканнердах эсвэл Туркийн SIM карттай байх шаардлага тавигддаг байв. Харин одоо зорчигчид хязгааргүй, үнэгүй Wi-Fi үйлчилгээг ашиглах боломжтой болсон байна. Гэхдээ Wi-Fi сүлжээнд хэрхэн холбогдох талаар нарийн мэдээлэл одоогоор хараахан тодорхойгүй байна.

Эдгээр өөрчлөлтүүд нь Стамбулын нисэх онгоцны буудлуудаар зорчиж буй хүмүүст илүү тав тухтай, тааламжтай нөхцөлийг бүрдүүлж байгаа юм.