Korean Air компани АНУ-д 50 тэрбум ам.долларын хөрөнгө оруулалт хийн, Боинг загварын 103 онгоц худалдан авахаар болсноо зарлалаа

Korean Air компани 36.2 тэрбум ам.доллар (50 их наяд вон)-ын үнэ бүхий, шинэ үеийн, өндөр үр ашигтай 103 онгоцыг Боинг компаниас нэмж худалдан авахаар болжээ. Мөн түүнчлэн тус компани GE Aerospace-тэй ойролцоогоор 690 сая доллар (1 их наяд вон)-ын онгоцны сэлбэг хөдөлгүүр, 13 тэрбум доллар (18.2 их наяд вон)-ын хөдөлгүүрийн засвар үйлчилгээний гэрээг тус тус байгуулж байна.

Энэ сарын 25-ны үдээс хойш Korean Air компанийнхан Вашингтон хотын "Willard InterContinental" зочид буудалд санамж бичигт гарын үсэг зуржээ. Уг арга хэмжээнд Ханжин группын ерөнхийлөгч Чу Вон Тэ, "Boeing Commercial Airplanes" компанийн ерөнхийлөгч бөгөөд гүйцэтгэх захирал Стефани Поп, "GE Aerospace"-ийн "Commercial Engines & Services"-ийн ерөнхийлөгч бөгөөд гүйцэтгэх захирал Рассел Стокс болон холбогдох бусад төлөөлөгчид оролцсон байна. Тэд 103 шинэ Боинг онгоц худалдан авах, 19 сэлбэг хөдөлгүүр болон хөдөлгүүрийн засвар үйлчилгээний тухай санамж бичгүүдийг тус тус байгууллаа.

Энэхүү Боинг онгоцны худалдан авалт нь Кореан Эйр болон Ашиана эйрлайнс компанийг нэгтгэсний дараах өсөлт, хөгжилд бэлтгэхэд чиглэсэн хөрөнгө оруулалтын нэг хэсэг юм. Ковид-19 цар тахлын дараа агаарын хөлгийн нийлүүлэлт удааширсан тул томоохон агаарын тээврийн компаниуд онгоцны захиалгын хугацааг түргэсгэх хандлагатай байна. Үүнийг харгалзан Korean Air компани 2030-аад оны дундаас сүүл үе хүртэлх агаарын хөлгийн хөрөнгө оруулалтын стратегийг боловсруулжээ.

Энэ удаагийн худалдан авалтад Боинг 777-9 загварын 20, 787-10 загварын 25, 737-10 загварын 50 онгоц, мөн ачаа тээврийн зориулалттай 777-8F загварын 8 онгоц багтжээ. Эдгээр онгоцыг 2030 он хүртэл үе шаттайгаар үйлчилгээнд нэвтрүүлэхээр төлөвлөж байна.

Энэхүү төлөвлөгөөний дагуу Korean Air компани урт хугацаанд онгоцны паркаа шинэчлэн, Боинг 777, 787, 737, Airbus A350, A321 neo гэсэн өндөр бүтээмжтэй таван загварын онгоцноос бүрдсэн флоттой болох юм. Ингэснээр Korean Air нь хүчин чадлын тогтвортой өсөлтийг хангах, флотыг жигдрүүлснээр цар хүрээний хэмнэлт гаргах, түлшний зарцуулалтыг бууруулж үр ашгийг нэмэгдүүлэх, нүүрстөрөгчийн ялгаралтыг багасгах, мөн хэрэглэгчийн сэтгэл ханамжийг дээшлүүлэх зэрэг олон талын ашиг тусыг бий болгоно.

Үүнээс гадна Korean Air нь GE Aerospace-ээс 11, CFM International-аас 8 онгоцны сэлбэг хөдөлгүүрийг тус тус худалдан авах юм. Мөн GE Aerospace нь 20 жилийн хугацаанд 28 агаарын хөлгийн хөдөлгүүрт засвар үйлчилгээ үзүүлнэ. Энэ нь агаарын хөлгийн тогтвортой ажиллагаа, аюулгүй байдлыг хангах зорилготой хөрөнгө оруулалтын нэг хэсэг юм.

Korean Air компаний энэ удаагийн Боинг онгоцны худалдан авалт нь АНУ-тай нисэхийн салбарын түншлэлийг бэхжүүлэх стратегийн алхам юм. Тус компани нь Боинг-оос гадна АНУ-д төвтэй Pratt & Whitney, General Electric (GE), Hamilton Sundstrand, Honeywell зэрэг нисэхийн салбарын бусад компаниудтай олон хэлбэрээр хамтран ажиллаж байна.

Korean Air компани 1971 оны дөрөвдүгээр сард АНУ руу (Сөүл-Токио-Лос-Анжелес) анхны ачаа тээврийн тогтмол нислэгээ, 1972 оны дөрөвдүгээр сард анхны зорчигч тээврийн чиглэлээ (Сөүл-Токио-Хонолулу-Лос-Анжелес) нээсэн цагаас хойш хоёр орны харилцаа, хамтын ажиллагааг түүчээлэн хөгжүүлсээр ирсэн урт түүхтэй. Энэхүү түүхэн эхлэл нь өнөөг хүртэл үргэлжилж, Delta Air Lines-тэй байгуулсан Номхон далай дамнасан хамтарсан түншлэлээр дамжуулан хоёр улсын хэрэглэгчдийн тав тухыг нэмэгдүүлэхэд ихээхэн хувь нэмэр оруулсаар байна.