"Победа" авиа компани чихэвчгүйгээр контент үзэхийг хориглолоо

ОХУ-ын "Победа" агаарын тээврийн компани нь нислэгийн үеэр хөгжим сонсох, кино үзэх, тоглоом тоглох зэрэг контентыг заавал чихэвч ашиглаж хэрэглэх шаардлагыг тавилаа.

Энэхүү шинэ заалт нь онгоцонд бусдын амгалан тайван байдлыг хангах зорилготой бөгөөд албан ёсны "Тээврийн дүрэм"-д тодорхой тусгагдсан байна. Ийнхүү чихэвчгүйгээр дуу чимээ гаргахыг хориглосон энэ заалт нь тамхи татах, техникийн хэсгийг дур мэдэн онгойлгох, нийтийн дэг журам зөрчих зэрэг ноцтой үйлдлүүдтэй адил түвшинд авч үзэгдэнэ.

Харин одоогоор Монголын агаарын тээврийн компаниуд ийм шууд хоригийг албан ёсоор тогтоогоогүй бөгөөд ихэвчлэн зорчигчдод дуу чимээ гаргахгүй байхыг санал болгох түвшинд л хэрэгжүүлж байна. Гэхдээ бодит байдал дээр зорчигчид чихэвчгүйгээр контент үзэх, тоглоом тоглох тохиолдол түгээмэл байгаа юм.

Цаашид "Победа" компани энэхүү дүрмээ тууштай мөрдөж, бусад агаарын тээврийн компаниуд ч энэхүү сайн жишээг даган мөрдөөсэй хэмээн уриалж байна.