Тайланд руу Зорчигчдын Анхааралд: Хилээр Нэвтрэх Үйл явц Цахим Хэлбэрт Шилжлээ!

Хил дээр саатах, хүндрэл учруулах эрсдэлээс сэргийлж, TDAC-аа урьдчилан бөглөөрэй!

Тайландын Вант Улсын Цагаачлалын алба хилээр нэвтрэх үйл явцыг хялбарчлах, хурдасгах зорилгоор 2025 оны 5 дугаар сарын 1-ний өдрөөс эхлэн хилээр нэвтрэх хуудас (Arrival card)-ыг TDAC (Thailand Digital Arrival Card) буюу Цахим Ирэх Карт хэлбэрт бүрэн шилжүүлснийг зорчигч та бүхэнд албан ёсоор мэдэгдэж байна.

Саяхан Бангкок дахь Монгол Улсын төлөөлөгчийн газраас ирүүлсэн мэдээллээр, зарим зорчигчид энэхүү цахим картыг урьдчилан бөглөөгүйгээс шалтгаалан Тайландын хилээр нэвтрэхдээ хүндрэл, сааталтай тулгарч байгаа нь тогтоогдлоо.

📝 TDAC – Тайландын Цахим Ирэх Картыг Хэрхэн Бөглөх Вэ?

Тайланд руу зорчиж буй бүх гадаадын иргэд хилээр нэвтрэхээсээ өмнө TDAC-ийг цахимаар бөглөх заавал байх шаардлагатайг анхаарна уу.

• Албан ёсны цахим хуудас: Зорчигчид https://tdac.immigration.go.th хаягаар нэвтэрч, TDAC-ийг бөглөнө. (Скам/залилангийн хуудаснаас болгоомжилж, зөвхөн албан ёсны холбоосыг ашиглана уу).

• Хугацаа: Та нислэгийн өдрөөс дээд тал нь 3 хоногийн өмнө цахим хуудсыг бөглөх боломжтой. Хил нэвтрэхээс өмнө бүрэн бөглөж дуусгасан байх шаардлагатай.

• Аргачлал: Хувь хүнээр болон бүлгээр (гэр бүл, хамт олон) бөглөх боломжтой.

• Шаардлагатай мэдээлэл: Паспортын мэдээлэл, хувийн мэдээлэл, аяллын мэдээлэл (нислэгийн дугаар, ирэх өдөр), Тайландад байрлах газрын мэдээлэл (зочид буудал, хаяг) болон эрүүл мэндийн мэдэгдэл зэргийг бөглөнө.

• Үр дүн: Мэдээллийг бөглөж баталгаажуулсны дараа та QR код бүхий баталгаажуулах мэйл эсвэл хуудас хүлээн авна. Үүнийг хилээр нэвтрэхдээ цагаачлалын ажилтанд үзүүлэхэд хангалттай (цаасаар хэвлэх шаардлагагүй).