УЛААНБААТАР-ИСТАНБУЛ ЧИГЛЭЛД ӨДӨР БҮР НИСЛЭГ ҮЙЛДЭХ БОЛОМЖТОЙ БОЛЛОО

Монгол Улсын Зам, тээврийн хөгжлийн сайдын зөвлөх Д.Эрдэнэбат, Иргэний нисэхийн ерөнхий газрын дарга С.Мөнхнасан тэргүүтэй төлөөлөгчид 2022 оны 12 дугаар сарын 16-ны өдөр Бүгд Найрамдах Турк Улсын Иргэний нисэхийн ерөнхий газрын төлөөлөгчидтэй Агаарын харилцааны тухай уулзалт хэлэлцээ зохион байгуулж дараах зүйлсийг тохирлоо.

Өсөн нэмэгдэж буй зорчигч урсгал, аялал жуулчлалыг дэмжих зорилгоор хоёр талаас томилогдсон агаарын тээвэрлэгчид Истанбул – Улаанбаатар чиглэлд дурын агаарын хөлгөөр долоо хоногт 7 хүртэлх давтамжтай, Анкара, Антальяа чиглэлд дурын агаарын хөлгөөр долоо хоногт 5 хүртэлх давтамжтай нислэг үйлдэхээр тохиролцлоо.

Мөн өмнө нь хоёр улсын хооронд нэг агаарын тээвэрлэгч томилгоо авч нислэг үйлдэх эрхтэй байсныг олон тооны агаарын тээвэрлэгч томилогдон нислэг үйлдэх эрхтэй байхаар тохиролцов.

Энэ удаагийн уулзалтаар тохиролцсон өөр нэгэн чухал зүйл бол хоёр талаас томилогдсон агаарын тээвэрлэгчид хоорондоо “Сode sharing” буюу аяллын дугаар хамтран ашиглах зохицуулалтаар гуравдагч орон луу нислэг үйлдэх зохицуулалт хийхээр боллоо.

Тиймээс “МИАТ” ТӨХК, “Туркиш Эйрлайнс” хамтран эхний ээлжийнд Амстердам, Барселона, Брюссель, Ром, Франкфурт, Вашингтон, Чикаго, Вена, Варшав, Цюрих хотууд руу аяллын дугаар хамтран ашиглах зохицуулалтаар нислэг үйлдэх бөгөөд бусад улстай мөн адил зохицуулалт тохирсноор АНУ зэрэг улсууд руу хямд үнээр зорчих боломж бүрдээд байна.

---

ТИЙЗ ЗАХИАЛГЫН СОШИАЛ ХӨТӨЧ AIRBOT 🎟👇